თორნიკე შენგელიას 16 ქულა და “ბასკონიას” დათმობილი ჩემპიონობა

თორნიკე შენგელიასთვის კარიერის საუკეთესო სეზონი დღეს დასრულდა. “ბასკონიას” ქართველმა კაპიტანმა მიმდინარე სეზონში ევროლიგისა და ესპანეთის ჩემპიონატის სიმბოლურ ხუთეულში მოიპოვა ადგილი და ორივე შემთხვევაში MVP-ის ტიტულამდე 1 ნაბიჯი დააკლდა. მას ამ ნომინაციაში ევროლიგისა და ესპანური ლიგის მომგებმა ლუკა დონჩიჩმა აჯობა.

სწორედ დონჩიჩის გუნდ მადრიდის “რეალთან” წააგო თორნიკემ ესპანეთის ჩემპიონატის ფინალური სერია. საერთო ანგარიშში 1:2 ჩამორჩენილმა “ბასკონიამ” ქართველი ლეგიონერის წინამძღოლობით ბოლომდე ებრძოლა სამეფო კლუბს, მაგრამ საბოლოოდ ვერას გახდა. ბასკონიელებმა სერიის მე-4 მატჩი 85:96 წააგეს და ჩემპიონობას ვერ შესწვდნენ. მადრიდის “რეალმა” წლეულს მოგებულ ევროლიგასთან ერთად ესპანეთის ჩემპიონობაც მოიპოვა.

შენგელია სასტარტო ხუთეულში გამოჩნდა და 26:47 წუთში 16 ქულა, 1 მოხსნა და 4 პასი მიითვალა. თორნიკემ მისთვის უჩვეულოდ ბევრი 9 სამქულიანი ესროლა და 4 ჩააგდო, რასაც 3-დან 2 ორქულიანი წაამატა, ბურთი ერთხელ დაკარგა, 3 პერსონალური ფოლი მიიღო, მის წინააღმდეგ კი 2-ჯერ დაჯარიმდნენ.

მადრიდის “რეალისთვის” ეს ესპანეთის 34-ე საჩემპიონო ტიტულია. ფინალური სერიის საუკეთესო მოთამაშედ რუდი ფერნანდესი დასახელდა, რომელმაც გადამწყვეტ მატჩში მადრიდელებს 27 ქულა შეაშველა.

gbf.ge

ნახეთ მეტი...