მინისტრი ძალოსნობის საერთაშორისო ფედერაციის დელეგაციას შეხვდა (ვიდეო)

31 მარტს, სპორტისა და ახალგაზრდობის საქმეთა მინისტრმა ტარიელ ხეჩიკაშვილმა სამინისტროში უმასპინძლა ძალოსნობის საერთაშორისო ფედერაციის დელეგაციას, რომელიც ზაფხულში თბილისში გასამართი ძალოსნობის ახალგაზრდული მსოფლიოს ჩემპიონატის საორგანიზაციო საკითხების გასაცნობად ჩამოვიდა. დელეგაციაში შედიან  - ატილა ადამფი (გენერალური დირექტორი), ენიკო ნემეფ-მორა (საერთაშორისო ურთიერთობების დირექტორი) და მატიას ლენკსერი (შეჯიბრებების მენეჯერი).

სტუმრები ვიზიტის ფარგლებში გაეცნობიან ჩემპიონატის საორგანიზაციო საკითხებს. ნახავენ სასტუმროებს, დარბაზებს, პრიზიორებისთვის განკუთვნილ მედლებს, დეტალურად შეისწავლიან კვების და ტრანსპორტირების საკითხებს. ამის შემდეგ გადაწყვეტენ თუ რომელი დარბაზი უმასპინძლებს მსოფლიოს ახალგაზრდულ პირველობას, რომელიც 25 ივნისიდან 2 ივლისის ჩათვლით ჩატარდება. ტურნირის ბიუჯეტი მილიონ 100 ათასი ლარია, პროგრამა უკვე დეტალურადაა გაწერილი.

ძალოსნობის საერთაშორისო ფედერაციამ - IWF - იუნიორთა მსოფლიო ჩემპიონატის თბილისში გამართვა ამერიკის ქალაქ ჰიუსტონში, აღმასრულებელი საბჭოს შეხვედრაზე გადაწყვიტა. გადაწყვეტილებაზე დადებითად იმოქმედა შარშან თბილისში უმაღლეს დონეზე ჩატარებულმა ევროპის ჩემპიონატმა. თბილისის სპორტის სასახლეში გამართული შეჯიბრება პოპულარულმა სპორტულმა არხმა "ევროსპორტმა" პირდაპირ ეთერში 40 საათის განმავლობაში გააშუქა.

25 ივნისიდან 2 ივლისის ჩათვლით უშუალოდ მსოფლიო ჩემპიონატი გაიმართება, თუმცა ოფიციალური შეხვედრები 21 ივნისიდან დაიწყება: 21 ივნისს ძალოსნობის საერთაშორისო ფედერაციის სხდომა შედგება; 22-23 ივნისს აღმასრულებელი საბჭოს შეხვედრაა დაგეგმილი, 24 ივნისს კი საერთაშორისო ფედერაციის კონგრესი.

https://www.youtube.com/watch?v=8IPkr1XmIHQ&feature=youtu.be

ნახეთ მეტი...